Bu axşam, 17 fevral tarixində xəbər saytı Lebanon Debate Livanın cənubunda yerləşən Ənsar kəndinin İsrailin xeyrinə casusluqda şübhəli bilinən bir sakininin həbs edildiyini bildirib.
İslamazeri.com xəbər verir ki, mənbənin məlumatına görə, Livanın daxili təhlükəsizlik qüvvələrinin informasiya şöbəsi bir ay ərzində casusun fəaliyyətinin qarşısını almaq üçün xüsusi əməliyyat keçirib və əməliyyat şübhəli şəxs — İsrailin “güc strukturları” ilə əlaqədə ittiham olunan Əhməd M.-nin həbsi ilə başa çatıb.
Yayımlanan məlumata əsasən, “zərbə bölməsi”nin əməkdaşları şübhəlini yerli yanacaqdoldurma məntəqəsində gözləyib, onun avtomobilini mühasirəyə alıb və əməliyyat başa çatanadək sakinlərin əraziyə yaxınlaşmasına icazə verməyiblər.
Həmçinin bildirilir ki, dindirmə zamanı M. İsraillə əməkdaşlıq etdiyini və Livandakı bir sıra obyektlərə dəqiq zərbələrin endirilməsinə kömək edən məlumatlar ötürdüyünü etiraf edib.
Məlumatda qeyd olunur ki, şübhəli şəxs İsrail strukturları ilə saxladığı “birbaşa əlaqələr” və ötürdüyü məlumatların “yüksək keyfiyyəti” səbəbilə “yüksək səviyyəli aktivist” kimi tanınıb.
Livan təhlükəsizlik qüvvələrinin nümayəndələrinin sözlərinə görə, M. öz kuratorları ilə görüşmək üçün bir neçə dəfə İsrailə səfər edib. Oxşar görüşlər Almaniya və İtaliyada da keçirilib.
Onun taleyinə yaxın vaxtlarda Livanın hərbi məhkəməsi qərar verəcək.
