Livan Trampın İsrail rəsmiləri ilə görüşmək iddialarını rədd edib.
İslamazeri.com xəbər verir ki, ABŞ prezidenti Donald Trampın İsrail və Livan liderləri arasında birbaşa görüşün keçiriləcəyi ilə bağlı açıqlaması Livan tərəfindən müsbət qarşılanmayıb. Beyrutdan xəbər verən Əl-Cəzirə müxbiri Zeyna Xodr bildirib ki, Livan rəsmi mənbələri bu cür diplomatik əlaqədən xəbərsizdir.
Livan rəsmisi ilə söhbətdə iki lider arasında mümkün telefon danışığı və ya Vaşinqtonda səfirlər səviyyəsində ikinci görüş barədə heç bir məlumatın olmadığı göstərilib.
Qeyd edək ki, ABŞ prezidenti Donald Tramp İsrail və Livan liderlərinin bu gün birbaşa danışıqlar aparacağını açıqlayıb.
Trampın Livan və İsrailə "nəfəs almaq üçün yer" verməsi ilə bağlı açıqlamaları atəşkəsin əlaməti kimi şərh olunsa da, yerli mənbələr bunu təsdiqləməyib.
Vaşinqtonda aparılan gərgin diplomatiyanın əsas məqsədinin Livan cəbhəsini İran cəbhəsindən ayırmaq olduğu deyilir.
Qeyd olunur ki, ABŞ administrasiyası bütün bu təşəbbüslər vasitəsilə Hizbullahın ölkədəki təsirini zəiflətməyi və İranın Livan üzərindəki təsirini zəiflətməyi hədəfləyir.
Ekspertlər vurğulayırlar ki, Vaşinqtondakı görüşlər konkret sülhə nail olmaqdan daha çox regionda güc balansını dəyişdirmək üçün strateji təşəbbüslə bağlıdır.
