"Hörmüz boğazı artıq tamamilə İnqilab Keşikçiləri Hərbi Dəniz Qüvvələrinin nəzarəti altındadır".
İslamazeri.com xəbər verir ki, İnqilab Keşikçiləri çərşənbə günü rəsmi açıqlamada Fars körfəzinə strateji cəhətdən əhəmiyyətli bir qapı və qlobal neft ticarəti üçün çox vacib olan Hörmüz boğazına tam nəzarəti ələ keçirdiklərini açıqlayıb.
Fars Xəbər Agentliyinin məlumatına görə, İnqilab Keşikçiləri tərkibində xidmət edən yüksək rütbəli dəniz zabiti Məhəmməd Əkbərzadə yeni status-kvonu elan edərək deyib: "Hörmüz boğazı artıq tamamilə İnqilab Keşikçiləri Hərbi Dəniz Qüvvələrinin nəzarəti altındadır".
Vaşinqtonun bu addıma reaksiyası sürətli olub.
Çərşənbə axşamı ABŞ prezidenti Donald Tramp ABŞ Hərbi Dəniz Qüvvələrinin bölgədəki əməliyyat imkanlarını vurğulayaraq, "lazım gələrsə", Hörmüz boğazından keçən neft tankerlərini müşayiət etmək qabiliyyətinə malik olduqlarını bildirib.
Bu hərbi və siyasi gərginlik artıq bölgədəki ticarət axınlarına kəskin təsir göstərməyə başlayıb.
CNN-in "S&P Global Commodities at Sea" məlumatlarına istinadən verdiyi məlumata görə, ötən bazar ertəsi günü boğazdan yalnız iki neft və kimyəvi maddə tankeri keçə bilib. Bu marşrut normal olaraq gündə təxminən 60 gəminin keçdiyi və qlobal neft tədarükünün 20%-ni daşıdığı marşrutdur.
