Gürcüstan Pravoslav Kilsəsinin genişləndirilmiş iclasında bu gün Gürcüstanın yeni Katolikos-Patriarxı kimi yepiskop Şio seçilib.
İslamazeri.com xəbər verir ki, Gürcüstan Pravoslav Kilsəsinin genişləndirilmiş iclasında bu gün Gürcüstanın yeni, 142-ci Katolikos-Patriarxı kimi yepiskop Şio seçilib.
Bütün Gürcüstanın yeni Katolikos-Patriarxı, Mtsxeta-Tbilisi baş arxiyepiskopu, Bichvinta və Tsxum-Abxaziya mitropoliti Şio Üçüncü adlanır.
Yepiskoplar üç namizəd arasında seçim ediblər. Səsvermənin nəticəsinə görə, Katolikos-Patriarx taxtının müvəqqəti varisi, Senaki və Çxorotsqu mitropoliti Şio (Mujiri) 22 səs, Mroveli-Urbnisi mitropoliti İob (Akiashvili) 9 səs, Poti və Xobi mitropoliti Qriqol (Berbiçaşvili) 7 səs alıb.
Gürcüstanın yeni Katolikos-Patriarxı kimdir?
Bütün Gürcüstanın Katolikos-Patriarxının koriskoposu, dünyəvi həyatda Elizbar Teimuraz oğlu Mujiri 1969-cu il 1 fevralda Tbilisidə anadan olub. Tbilisinin 53 saylı orta məktəbini bitirdikdən sonra (eyni zamanda musiqi məktəbində oxuyaraq), 1988-ci ildən Elizbar Mujiri Tbilisi Dövlət Konservatoriyasında təhsilini davam etdirib. 1991-ci ildə Elizbar Mujiri Şiomğvime monastırında rahib kimi yaşamağa başlayıb. 1993-cü il 5 fevralda rahib Elizbar rahibliyə qəbul edilərək ona Şio adı verilib. O, monastırın süfrəxana xidmətinə, daha sonra iqtisadi işlərinə təyin olunub. 1995-ci ildə Şio rahib-diakon, 1996-cı ildə isə bütün Gürcüstan Katolikos-Patriarxı İliya İkinci tərəfindən rahib-kahin təyin edilib. 1997-ci ildə o, Tbilisinin Kldisubani Müqəddəs Giorgi kilsəsinin rəhbəri təyin olunub.
1998-ci ildə Batumi İoane Qvtebmeteli adına dini seminariyanı bitirib və Moskva Ruhani Akademiyasının qiyabi şöbəsində təhsilini davam etdirib. 1998-ci il 3 apreldə ona hegumen rütbəsi verilib və İliya Peyğəmbər kilsəsinin rəhbəri təyin olunub. 1999-cu il 6 martdan Tbilisi Anchiskhati kilsəsində xidmət edib. Həmin ilin 20 sentyabrından Narikala Müqəddəs Nikolay kilsəsinin rəhbəri olub. 2001-ci ilin oktyabrından Moskva gürcü icmasının Müqəddəs Giorgi kilsəsinin rəhbəri olub və eyni zamanda Moskva Müqəddəs Tixon dini institutunda oxuyub.
2003-cü il 18 avqustda Gürcüstan Pravoslav Kilsəsinin Müqəddəs Sinodu onu yeni yaradılmış Senaki və Çxorotsqu yeparxiyasının rəhbəri seçib. 7 sentyabrda Svetitsxoveli kafedralında onun yepiskop təyinatı həyata keçirilib. 2007-ci il 25 dekabrda Müqəddəs Giorgi ordeni ilə təltif edilib. 2009-cu ildə arxiyepiskop rütbəsinə yüksəldilib. 2010-cu il 2 avqustda Katolikos-Patriarxın koriskoposu təyin olunub. 2017-ci il 23 noyabrda Katolikos-Patriarx taxtının müvəqqəti varisi olub, 2018-ci il 21 iyunda isə brilyant xaç taxmaq hüququ alıb.
