Rusiyalı senator: ABŞ-ın İranın uranını ələ keçirməsi mümkün deyil
İslamazeri.com xəbər verir ki, Rusiya Federasiya Şurasının üzvü Aleksey Puşkov bildirib ki, Vaşinqton administrasiyasının İranın razılığı və əməkdaşlığı olmadan zənginləşdirilmiş uranı ələ keçirməsi texniki və siyasi cəhətdən mümkün deyil.
Məsələ ilə bağlı Telegram vasitəsilə danışan senator Puşkov iddia edib ki, ABŞ nüvə obyektlərini izləmək imkanına malik olsa da, materialları ələ keçirməkdə aciz qalacaq.
Puşkov ABŞ prezidenti Donald Trampın İranın nüvə materiallarının saxlanıldığı yerləri bildikləri, bu obyektləri kosmik kəşfiyyatla izlədikləri və "uranı müəyyən bir mərhələdə ələ keçirəcəkləri" iddialarına cavab verib.
Rusiyalı siyasətçi Trampın yanaşmasını "həddindən artıq özünəinamlı bir insanın boş vədləri" kimi xarakterizə edib. O, hərbi əməliyyat şəraitində bir bölgədən nüvə materiallarını çıxarmaq və təhlükəsiz şəkildə daşımaq praktik olaraq mümkün olmadığını vurğulayıb.
Puşkov zənginləşdirilmiş uranın daşınması üçün beynəlxalq səviyyədə qəbul edilmiş standartların olduğunu və belə bir əməliyyatın baş tutması üçün dörd vacib şərtin zəruri olduğunu qeyd edib.
Senator bu prosesin ilkin şərtlərini dinc mühit, uran ötürülməsi ilə bağlı rəsmi razılaşma, Beynəlxalq Atom Enerjisi Agentliyi (BAEA) ilə əlaqələndirilmiş ətraflı fəaliyyət planı və ən əsası, nüvə materiallarının sahibi olan İranın tam razılığı və əməkdaşlığı kimi sadaladı.
Puşkovun sözlərinə görə, bu dörd əsas şərtdən heç biri hazırkı regional kontekstdə yerinə yetirilmir. O bildirib ki, İranın əməkdaşlıq etmədiyi və dinc mühitin yaradılmadığı bir ssenaridə ABŞ-ın nüvə ehtiyatlarını fiziki olaraq ələ keçirməsi ehtimalı reallıqdan çox uzaqdır.
