Laricani qeyd edib ki, düşmənin "daxili iğtişaş – hərbi hücum" taktikası xalqın birliyi sayəsində uğursuzluğa düçar olub.
İslamazeri.com xəbər verir ki, İran Milli Təhlükəsizlik Ali Şurasının katibi Əli Laricani, ölkədəki son iğtişaşları idarə edən əsas şəxslərin müəyyən edilərək həbs olunduğunu və bu hadisələrin ABŞ-ın hərbi müdaxiləsi üçün zəmin hazırlamaq məqsədi daşıdığını bəyan edib.
Laricani Silahlı Qüvvələrin siyasi rəhbərlərinin toplantısında çıxış edərək bildirib ki, kəşfiyyat və təhlükəsizlik orqanları iğtişaşların "baş xətlərini" (idarəedici mərkəzlərini) identifikasiya ediblər. Artıq bu şəbəkənin bəzi rəhbər üzvləri saxlanılıb. O, iğtişaşçıları mütəşəkkil "şəhər terrorçu qrupu" kimi xarakterizə edib və onların birbaşa xarici kəşfiyyatlarla əlaqəli olduğunu vurğulayıb.
Ali Milli Təhlükəsizlik Şurasının katibi bildirib ki, ABŞ-ın keçmiş prezidenti Donald Tramp sosial böhran yaradılacağı təqdirdə hərbi əməliyyata keçiləcəyini açıq şəkildə bəyan etməklə bu strategiyanı ifşa edib. Onun sözlərinə görə, bu dəfə ABŞ-ın taktikası dəyişib və məqsəd əvvəlcə xalqın birliyini sarsıtmaq, daha sonra isə hərbi müdaxilə həyata keçirmək olub.
Laricani qeyd edib ki, ölkədə iqtisadi problemlər mövcuddur və hökumət bu məsələlərə diqqət ayırmalıdır. Bununla yanaşı, o vurğulayıb ki, düşmən qüvvələr mövcud şəraitdən öz maraqları naminə istifadə etməyə çalışır. Onun sözlərinə görə, düşmənlər son hadisələri dörd mərhələdə – xalq toplaşmaları, terror, iğtişaşlar və sonda hərbi hücum – planlaşdırıblar, lakin xalqın birliyi sayəsində bu plan da iflasa uğrayıb.
Laricani iğtişaşlarda iştirak edən qrupları “şəhər tipli yarı-terrorçu qruplar” kimi xarakterizə edib və bildirib ki, bir neçə ay əvvəl də sionist dairələr İranda yaratdıqları strukturlardan yeni bir ssenari üçün istifadə edəcəklərini açıq şəkildə bəyan etmişdilər.
