Milli arxiv fondu sənədlərindən istifadə qaydası müəyyənləşib.
Nazirlər Kabineti “Arxiv fondlarının tərkibi və həcmi barədə məlumatların verilməsi Forması”nın və “Milli arxiv fondu sənədlərindən istifadə Qaydası”nın təsdiq edilməsi və “Milli arxiv fondunun komplektləşdirilməsi, mühafizəsi və ondan istifadə Qaydaları haqqında Əsasnamənin, Arxivlərin, arxiv fondlarının və sənəd kolleksiyalarının Milli arxiv fondunun tərkibinə daxil edilməsi, bu tərkibdən çıxarılması və ya məhv edilməsi Qaydasının, Qeyri-dövlət arxiv fondlarının mühafizəsi üzrə Qaydaların, Aşkar edilmiş və ya tapılmış arxiv sənədlərini aşkar edən və ya tapan şəxsləri mükafatlandırma Qaydasının, Dövlət arxiv fondunun sənədlərindən istifadə Qaydalarının və Beynəlxalq əməkdaşlıq məqsədi ilə sənədlərin və kolleksiyaların xaricə müvəqqəti aparılması Qaydasının təsdiq edilməsi haqqında” qərarında dəyişiklik edilməsi barədə” qərar verib.
İslamazeri.com xəbər verir ki, “Arxiv fondlarının tərkibi və həcmi barədə məlumatların verilməsi Forması” sahə arxiv fondlarında mühafizə edilən milli arxiv fondu sənədlərinin kəmiyyət və keyfiyyət göstəriciləri barədə məlumatın əldə edilməsini və onların daha etibarlı mühafizəsinə nəzarət etməklə dövlət qeydiyyatının aparılmasını təmin edir. Qanuna əsasən, təşkilatlar bu formaya uyğun olaraq, arxiv fondlarının tərkibi və həcmi barədə Milli Arxiv İdarəsinə hər il yanvar ayının 25-dək məlumat verməlidirlər.
“Milli arxiv fondu sənədlərindən istifadə Qaydası” ilə əsasən aşağıdakı məsələlər tənzimlənir:
- Milli arxiv fondu sənədlərindən istifadənin formaları;
- hüquqi və fiziki şəxslərin müraciətləri və ya arxivin öz təşəbbüsü ilə arxiv sənədləri əsasında məlumatın verilməsi məsələlərinin tənzimlənməsi;
- Milli arxiv fondu sənədlərinin dövlət arxiv xidməti təşkilatının oxu zallarında elmi-tədqiqat məqsədilə istifadəçilərə verilməsinə dair tələblərin və məsuliyyətin müəyyən edilməsi;
- Milli arxiv fondu sənədlərinin sərgilərdə, muzeylərdə nümayiş etdirilməsi ilə bağlı məsələlər;
- Milli arxiv fondu sənədləri əsasında elmi nəşrlərin, sənəd külliyyatlarının hazırlanması;
- Milli arxiv fondu sənədlərinin əsillərinin mədəni-kütləvi təbirlərlə bağlı zərurət olduqda arxiv sənədlərinin mülkiyyətçisinə, habelə istintaq, əməliyyat-axtarış faəliyyəti üçün müvafiq qurumlara müvəqqəti istifadəyə verilməsi;
- Arxiv fondu sənədlərindən istifadənin digər formaları (vətəndaşın şəxsi və ailə həyatı ilə bağlı, mədəni irs hesab edilən arxiv fondu sənədlərindən, habelə məxfi və konfidensial sənədlərdən istifadə) və bu zaman həyata keçirilən prosedurlar.
