Birləşmiş Millətlər Təşkilatının Livandakı Müvəqqəti Qüvvələri (UNIFIL) İsrail təyyarələrinin Livanın cənubuna naməlum kimyəvi maddə püskürtdüyünü bildirib.
İslamazeri.com xəbər verir ki, UNIFIL-dən verilən yazılı açıqlamada deyilir ki, İsrail ordusu dünən səhər sülhməramlı qüvvələrə əvvəlcədən məlumat verib ki, Livanın cənubundakı sərhəd xətti olan Mavi Xəttə yaxın ərazilərə kimyəvi maddə atılacaq.
Bəyanatda əlavə edilib ki, İsrail ordusu UNIFIL personalından ərazidən uzaq durmağı və qapalı məkanlarda qalmağı xahiş edib və bu da sülhməramlı qüvvələri 10-dan çox fəaliyyəti ləğv etməyə məcbur edib.
Qeyd edilib ki, UNIFIL maddənin zəhərli olub-olmadığını müəyyən etmək üçün Livan ordusuna nümunələr toplamağa kömək edib.
Bəyanatda vurğulanıb ki, sionist İsrail ordusu tərəfindən Livan üzərinə kimyəvi maddələrin atılması yeni bir hal deyil, lakin bu cür fəaliyyətlər qəbuledilməzdir və Birləşmiş Millətlər Təşkilatının Təhlükəsizlik Şurasının 1701 saylı qətnaməsinin pozulmasıdır.
Bəyanatda həmçinin bildirilir ki, İsrail ordusunun qəsdən və planlaşdırılmış hərəkətləri UNIFIL-in öz missiyalarını yerinə yetirmək qabiliyyətini məhdudlaşdırır və sülhməramlı personalın və mülki şəxslərin sağlamlığına təhlükə yarada bilər.
UNIFIL sülhməramlı əsgərləri və mülki şəxsləri təhlükəyə atan bütün fəaliyyətlərə dərhal son qoyulmasını və bölgədə sabitliyi təmin etmək üçün İsraillə tam əməkdaşlığa çağırıb.
Bu arada, Livan Ətraf Mühit Nazirliyi İsrail təyyarələrinin cənub sərhədinə yaxın Atya əl-Şaab şəhəri və ətrafında şübhəli maddələr püskürtdüyü barədə məlumatlardan sonra tədbir görüb.
Livan rəsmi agentliyi NNA-nın məlumatına görə, Ətraf Mühit naziri Tamara əz-Zeyn kimyəvi maddənin təbiətini müəyyən etmək üçün nümunələr almaq məqsədilə Livan ordusu ilə əlaqə saxlayıb.
