İranın Kəşfiyyat Nazirliyi xalqın səmərəli əməkdaşlığı ilə Tehranda terrorçu dəstələrin başçılarının müəyyən edilərək həbs olunmasının davam etdiyini açıqlayıb.
İslamazeri.com PressTV-yə istinadən xəbər verir ki, Nazirliyin məlumatına görə, son iğtişaşlar zamanı Tehranın yeddi əsas bölgəsində ictimai və dini məkanlar, eləcə də təhlükəsizlik qüvvələri iğtişaşçılar tərəfindən hədəfə alınıb. İğtişaşçılar iki məscidi yandırıb, Tehranın əsas avtomagistrallarından birini bağlayıb və “Bəsic” könüllü qüvvələrinin iki üzvünü qətlə yetiriblər.
İran polisinin rəisinin sözlərinə görə, ictimai əmlakın dağıdılmasında iştirak etmiş 297 iğtişaşçı müəyyən edilərək polis qüvvələri tərəfindən həbs olunub.
Son günlər terrorçulara qarşı aparılan əməliyyatlar zamanı iki terrorçu öldürülüb, 17 nəfər isə yaralanıb.
Polis həmçinin bu terrorçuların gizləndiyi yerlərdən çoxlu sayda odlu və soyuq silahlar, eləcə də partlayıcı maddələr müsadirə edib.
Həbs olunan şəxslərin İsrail rejimi ilə əlaqəli terror qrupları ilə bağlantıları barədə 20 cinayət işi açılıb.
Şəhidlər Fondunun rəhbəri Əhməd Musəvi bildirib ki, şəhidlər – mülki şəxslər və təhlükəsizlik qüvvələrinin üzvləri daxil olmaqla – döyüş və ov silahları, bıçaqlar, baltalar və digər müxtəlif silahlarla qətlə yetirilib.
İqtisadi çətinliklərə qarşı dinc etirazlar ötən həftə ABŞ və İsrail liderlərinin açıqlamaları ilə qızışdırılaraq iğtişaşlara çevrilib. Silahlı qruplar ictimai əmlaka ziyan vurub, mülki şəxslər və təhlükəsizlik qüvvələri arasında itkilərə səbəb olub.
Onlarla iranlı mülki şəxs və təhlükəsizlik əməkdaşı iğtişaşçılar tərəfindən şəhid edilib. İslam Respublikasının kəşfiyyat orqanları bu şəxslərin Vaşinqton və İsrail rejiminin “Mossad” kəşfiyyat xidməti tərəfindən kəşfiyyat, əməliyyat, logistik və maliyyə dəstəyi aldığını təsdiqləyib.
İran rəsmiləri qeyd ediblər ki, bu iğtişaşlar vasitəsilə ölkənin düşmənləri birbaşa hərbi təcavüz zamanı uğursuzluqlarını kompensasiya etməyə çalışıblar.
Eyni zamanda, rəsmi şəxslər bütün hallarda vurğulayıblar ki, ölkə iqtisadi problemlərin aradan qaldırılması üçün lazımi səylər göstərir, lakin etirazların iğtişaşlara çevrilməsinə yönələn istənilən cəhdə qarşı qəti mövqe tutur.
