DYP sürət həddinin aşılması ilə bağlı xəbərdarlıq edib.
Daxili İşlər Nazirliyinin Baş Dövlət Yol Polisi İdarəsi yol hərəkəti qaydalarına əməl olunmaması, sürət həddinin aşılması halları barədə məlumat yayıb.
İdarədən "İslamazeri.com"a daxil olan məlumatda deyilir ki, Baş Dövlət Yol Polisi İdarəsi tərəfindən hərəkət iştirakçılarına yol hərəkəti qaydalarına ciddi əməl etmələri, yollarda təyin edilən sürət həddini aşmamaları, təhlükəli manevr hərəkətləri etməməyi və avtomobildə təhlükəsizlik kəmərindən istifadənin vacibliyi barədə dəfələrlə məlumatlar verilməsinə baxmayaraq bəzi sürücülər hələ də, kobud qayda pozuntuları törədərək ağır yol-nəqliyyat hadisələrinin baş verməsinə səbəb olurlar:
“Bir daha bütün sürücüləri yollarda sürət həddinə riayət etməyə və təhlükəli manevrlər etməməyə çağırırıq. Unutmayaq ki, ağır yol nəqliyyat hadisələrinə səbəb olmağınız hüquqi məsuliyyətlə yanaşı bir ömür vicdan əzabı çəkməyinizə və peşmançılıq hissi yaşamağınıza səbəb olur. Belə peşmançılıqlar olmasın deyə vaxtında qaydalara əməl etmək vacibdir.
Təəssüf ki, dünən Bakı Şəhəri Kənar Dairəvi yolda sürət həddini aşaraq manevretmə qaydasını kobud şəkildə pozan sürücünün törətdiyi qəzada bir nəfər həlak olub.
Həmin qəzanı törədən "KİA" markalı, 90-NE-840 dövlət nömrə nişanlı avtomobilin sürücüsü Seyidov Namiq Mirqasım oğlu DYP əməkdaşları ilə söhbət zamanı sükan arxasında məsuliyyətsizlik etdiyini, tələsdiyi üçün kobud şəkildə manevretmə qaydasını pozduğunu etiraf edib”.
Bildirilib ki, sürücü işə çox vaxt həmin yolla getdiyini, həmin yolda radarların yerini bildiyini, radara çatanda sürəti azaldıb, sonra yenidən artırdığını deyib. Baş verən hadisədə təhlükəsizlik kəməri sayəsində sağ qaldığını vurğulayan sürücü “sərnişin xanım da təhlükəsizlik kəmərini taxsaydı, bəlkə heç nə olmazdı”, deyə vurğulayıb.
Qeyd edilib ki, ölən şəxsin iki azyaşlı övladı var.
