İraq Baş naziri Məhəmməd Şiə əl-Sudani Birləşmiş Millətlər Təşkilatının rəsmisi ilə görüşdə mühüm açıqlamalar verib. O, İŞİD məhbuslarının Suriyanın şimal-şərqindən İraq həbsxanalarına köçürülməsinin "müvəqqəti" bir addım olduğunu vurğulayıb.
İslamazeri.com xəbər verir ki, Sudani bu addımın milli və regional təhlükəsizliyin qorunmasını hədəflədiyini bildirib.
O, ölkəsinin terror fəaliyyətlərinin qarşısını almaq üçün düzgün həllər hazırlamaq məsuliyyətini və qabiliyyətini nümayiş etdirdiyini bildirib.
İraq Baş naziri açıqlamasında, beynəlxalq ictimaiyyətə də çağırış edib. O, bütün müvafiq ölkələri İŞİD sıralarında döyüşən vətəndaşlarını geri götürməyə və onların ədalətli mühakimə olunmasını təmin etməyə dəvət edib. Sudani mesajı çatdırıb: "Onlar vətəndaşlarını geri götürməli və layiq olduqları cəzanı alması üçün onları mühakimə etməlidirlər".
BMT rəsmisi Atul Xare İraqın bu addımının vacibliyini vurğulayıb. Bildirilib ki, BMT Baş katibi Antonio Quterreş İraqın regional sabitliyin təmin edilməsindəki rolunu və xüsusən də İŞİD üzvü olan İraq vətəndaşlarının köçürülməsindəki əməkdaşlığını qeyd edib. Xare terror təhlükəsinin yayılmasının qarşısını almaq üçün beynəlxalq dəstəyə ehtiyac olduğunu vurğulayıb.
