Tramp: İranla razılaşma istənilən an ola bilər.
İslamazeri.com xəbər verir ki, dünən gecə ABŞ və İran qüvvələri arasında baş verən toqquşmalardan sonra, "atəşkəsi pozmadıq" deyən ABŞ prezidenti Donald Tramp bu gün İran məsələsi ilə bağlı mətbuata açıqlama verib.
Tramp bildirib ki, ABŞ ordusunun iki İran obyektinə hava hücumlarına baxmayaraq, Tehran administrasiyası ilə danışıqlar davam edir və əlavə edib:
(İranla razılaşmanın qaçılmaz olub-olmadığı ilə bağlı suala cavab olaraq) "Bu, istənilən an baş verə bilər. Bəlkə də yox, amma istənilən an baş verə bilər. İnanıram ki, onlar bu razılaşmanı məndən daha çox istəyirlər.
Razılaşmanı tez bir zamanda imzalasalar yaxşı olar. Bunu etməsələr, çox əziyyət çəkəcəklər."
Dünən Hörmüz boğazından keçən iki ABŞ esminesi İranın hücumuna toxunan, lakin gəmilərin zədələnmədiyini qeyd edən Tramp deyib: "Onlar bizə atəş açırdılar, biz də cavab atəşi açırdıq." ABŞ prezidenti bildirib:
"Biz onlara nüvə silahına sahib olmaq hüququ verməyəcəyik, bunun şansı sıfırdır və onlar bunu bilirlər və qəbul ediblər. Görək, imzalamağa hazır olacaqlarmı?"
Tramp həmçinin bazar ertəsi günü ticarət gəmilərinin Hörmüz boğazından keçməsi ilə bağlı "Azadlıq Əməliyyatı"nı başlatdığını və 36 saat sonra dayandırdığını izah etdi.
O, bu proses zamanı Pakistanın onlara "Danışıqlar davam edərkən bu cür əməliyyat mümkün deyil" dediyini söylədi. Əməliyyatın heç bir fayda verməyəcəyinə toxunan Tramp qeyd etdi:
"Marşal (Asim Munir) və Baş nazir (Şahbaz Şərif) bizdən bunu etməməyimizi istədilər. Lazım gələrsə, biz bunu etməyə qayıdacağıq. Lakin onlar danışıqlar zamanı bizdən bunu etməməyimizi istədilər."
Dünən İran İnqilab Keşikçiləri Korpusunun Xatəm əl-Ənbiya Mərkəzi Qərargahının sözçüsü İbrahim Zülfiqari ABŞ-ın İranın müəyyən ərazilərinə və iki gəmiyə hücum edərək atəşkəsi pozduğunu bildirdi.
Zülfiqari dedi: "Təcavüzkar Amerika ordusu İranın sahil suları yaxınlığındakı Caskdan Hörmüz boğazına doğru üzən bir İran tankerinə və Hörmüz boğazına daxil olan başqa bir gəmiyə hücum edərək atəşkəsi pozdu" və əlavə etdi ki, İran ordusu dərhal cavab verdi.
