İranın xarici işlər naziri Seyid Abbas Əraqçi deyib: "Nüvə sazişinin layihəsi hazırlanır".
İslamazeri.com xəbər verir ki, İranın xarici işlər naziri Seyid Abbas Əraqçi MSNBC-yə verdiyi müsahibədə İranın nüvə proqramına hərbi həll yolu olmadığını vurğulayaraq yeganə həll yolunun diplomatiya olduğunu bildirib.
Əraqçi deyib: "Xüsusilə bir məqamı vurğulamalıyam: İranın nüvə proqramına hərbi həll yolu yoxdur. Bu, əvvəllər də sınaqdan keçirilib. Obyektlərimizə geniş miqyasda hücum edilib, alimlərimiz öldürülüb. Lakin onlar nüvə proqramımızı məhv edə bilməyiblər. Çünki bu proqram biz və alimlərimiz tərəfindən hazırlanıb".
İranlı nazir nüvə texnologiyasının İrana məxsus olduğunu bildirərək deyib: "Bu texnologiya bombardman və hərbi əməliyyatlarla məhv edilə bilməz. Yeganə həll yolu diplomatiyadır. Buna görə də ABŞ danışıqlar masasına qayıdıb və razılaşma axtarır".
Əraqçi İranın həm sülhə, həm də özünümüdafiəyə hazır olduğunu vurğulayıb və deyib: "Biz müharibəyə qədər diplomatiya və danışıqlara da hazırıq".
“Diqqət proqramın dinc saxlanmasına, o cümlədən zənginləşdirməyə yönəlib”
Nüvə danışıqlarının məzmununa toxunan Əraqçi bəzi iddiaların həqiqəti əks etdirmədiyini bildirdi.
“Hazırda birlikdə işləyirik. Sıfır zənginləşdirmə üçün heç bir təklif təqdim etməmişik və Amerika tərəfi “sıfır zənginləşdirmə” tələb etməyib”, - deyən Əraqçi danışıqların əsas məqsədinin İranın nüvə proqramının, o cümlədən zənginləşdirmə fəaliyyətlərinin dinc qalmasını təmin etmək olduğunu əlavə etdi.
Əraqçi bildirib ki, “Əvəzində İran etimad yaradan tədbirlər görəcək və sanksiyaların qaldırılması müzakirə olunacaq”.
