Qəzzada atəşkəs razılaşması çərçivəsində bir sıra pozuntu hallarının baş verdiyi bildirilir. Məlumata görə, cümə günü İsrail ordusu tərəfindən bəzi ərazilərdə atəş açılması və artilleriya atəşi qeydə alınıb.
İslamazeri.com xəbər verir ki, Fələstin mənbələri bildiriblər ki, hərbi texnika Qəzza zolağının mərkəzində yerləşən Deyr əl-Bələh şəhərinin şərqinə, eləcə də zolağın cənubundakı Xan Yunis şəhərinin şərqinə doğru atəş açıb.
Eyni mənbələrə əsasən, razılaşmanın humanitar müddəalarının icrasında da problemlər yaşanır. Bildirilir ki, köçkünlərin yerləşdirilməsi və humanitar yardım üçün nəzərdə tutulan avadanlıqların bölgəyə girişində məhdudiyyətlər qalmaqdadır. Bu vəziyyətin xüsusilə hava şəraitinin pisləşməsi fonunda humanitar çətinlikləri artırdığı qeyd olunur.
Məlumata görə, atəşkəsin ikinci mərhələsinə uyğun olaraq geri çəkilməli olan bəzi ərazilərə yaxın zonalarda təhlükəsizlik insidentləri qeydə alınıb. Atəşkəsin ikinci mərhələsi ötən həftə qüvvəyə minib, lakin onun bütün müddəalarının praktikada tam icra olunmadığı bildirilir.
Fələstin tərəfinin məlumatına əsasən, oktyabrın 10-dan qüvvədə olan atəşkəs razılaşmasının pozulması nəticəsində 492 nəfər həyatını itirib, 1301 nəfər yaralanıb.
