İrandan BƏƏ-yə: İsraillə əməkdaşlıq etmək bağışlanmazdır!
İslamazeri.com xəbər verir ki, İranın xarici işlər naziri Abbas Əraqçi çərşənbə günü bildirib ki, İsrailin baş naziri Benyamin Netanyahu "İran təhlükəsizlik qurumlarının uzun müddətdir hökumətə çatdırdığı qiymətləndirmələri açıq şəkildə ortaya qoyub".
Əraqçi sosial media hesabında paylaşım edərək bildirib ki, "Böyük İran xalqına düşmənçilik etmək axmaqca bir qumardır". O əlavə edib ki, "Bu istiqamətdə İsraillə əməkdaşlıq etmək bağışlanmazdır".
Əraqçi həmçinin yazıb ki, "İsraillə nifaq toxumu səpmək üçün əməkdaşlıq edənlər məsuliyyət daşıyacaqlar".
Bu açıqlama İsrail Baş nazirinin ofisinin Netanyahunun İranla müharibə zamanı Birləşmiş Ərəb Əmirliklərinə gizli səfər etdiyini açıqlamasından sonra verilib. Ofis Netanyahunun BƏƏ prezidenti Məhəmməd bin Zayedlə görüşdüyünü bildirib.
Netanyahunun ofisi səfəri iki tərəf arasındakı münasibətlərdə "tarixi irəliləyiş" kimi qiymətləndirib.
İsrailin 12-ci Kanal televiziyasının məlumatına görə, görüş 26 martda Oman sərhədinə yaxın və İran sərhədindən təxminən 250 kilometr məsafədə yerləşən Əl-Əyn şəhərində baş tutub.
Kanal bildirib ki, "tarixi irəliləyiş" ifadəsi ABŞ-ın İsraildəki səfiri Mayk Hakabinin Tel-Əviv Universitetində keçirilən konfransda verdiyi açıqlama ilə əlaqələndirilə bilər.
Konfransda Hakabi İsrailin İran hücumlarına qarşı istifadə üçün BƏƏ-yə "Dəmir Günbəz" batareyaları göndərdiyini və iki tərəf arasında "müstəsna münasibət" olduğunu bildirib.
Bu arada, İsrailin Kan televiziyası İsrail Hərb Nazirliyinin müşaviri başda olmaqla yüksək səviyyəli İsrail təhlükəsizlik nümayəndə heyətinin İrana qarşı müharibəyə hazırlıq dövründə BƏƏ-yə səfər etdiyini bildirib.
Kanın hesabatına görə, səfər Tel-Əviv və Vaşinqtonun "Aslanın nəriltisi" əməliyyatına başlamağa hazırlaşdığı bir dövrdə baş tutub.
"The Wall Street Journal" əvvəllər BƏƏ-nin İran hədəflərinə edilən bəzi hücumların arxasında olduğunu bildirmişdi.
Qəzet aprelin əvvəlində Lavan adasındakı neft emalı zavoduna edilən hücumun da bu kontekstə daxil olduğunu bildirib.
Məlumata görə, əməliyyat İranın BƏƏ-nin mülki infrastrukturunu və enerji ehtiyatlarını hədəf almasına cavab olaraq gizli şəkildə həyata keçirilib.
